• प्रदेश नं ४ को प्रदेश विनियोजन विधेयक बहुमतले पारित

    पोखरा न्यूज -०७, असार । प्रदेश नं ४ प्रदेशसभाको आजको बैठकमा प्रदेश विनियोजन विधेयक, २०७५ पारित भएको छ । आर्थिक मामिला तथा योजना मन्त्री किरण गुरुङले विधेयक पारित गरियोस् भन्दै प्रदेशसभामा प्रस्तुत गरेका प्रस्तावलाई बहुमतले स्वीकृत गरेको हो । यसअघि विधेयकमाथिको छलफलमा भाग लिदैं प्रदेशसभा सदस्यहरूले विनियोजित रकम पारदर्शी हुनुपर्ने बताउँदै यसको प्रभावकारी कार्यान्वयनमा जोड दिएका थिए । प्रदेशसभा सदस्य धनञ्जय दवाडीले बजेट आत्मनिर्भरतातर्फ उन्मुख बन्नुपर्नेमा जोड दिए । अर्का सदस्य कुमार खड्काले बजेटको विनियोजन शीर्षकगत रुपमा हुनुपर्ने भए पनि त्यो हुन नसकेकोमा गुणासो व्यक्त गरे । सदस्य हरिशरण आचार्यले शीर्षकगत रुपमा नभई मन्त्रालयको बजेट पोको पारिएको बताउँदै बजेट समान रुपमा वितरण हुनुपर्ने माग गरे। यसैगरी सदस्यहरु मणिभद्र शर्मा, पियारी थापा, चन्द्रबहादुर बुढा, कृष्ण थापा, रोशनबहादुर गाहा थापा, मधुमाया अधिकारी, धनमाया लामा पोखरेल, लक्ष्मी सुनार, सरिता गुरुङ, राजिव पहारी, चन्द्रमोहन गौचन र मनकुमारी गुरुङले बजेटलाई पारदर्शी बनाउनुपर्ने उल्लेख गर्दै यसको प्रभावकारी कार्यान्वयन हुनुपर्नेमा जोड दिए । छलफलमा उठेका विषयमा सामाजिक विकास मन्त्री नरदेवी पुन, भौतिक पूर्वाधार विकास मन्त्री रामशरण बस्नेत, भूमि व्यवस्था, कृषि तथा सहकारी मन्त्री लेखबहादुर थापा र आन्तरिक मामिला तथा कानून मन्त्री हरिबहादुर चुमानले बजेटको कार्यान्वयनमा सत्तापक्ष र प्रतिपक्ष नभनी अघि बढ्ने विश्वास व्यक्तगरे । अर्को बैठक असार १० गते अपरान्ह् १ः०० बजे बस्नेछ । The post प्रदेश नं ४ को प्रदेश विनियोजन विधेयक बहुमतले पारित appeared first on Pokhara News. […]

  • नेपाल चीनबीच रेलमार्ग निर्माणमा महत्वपूर्ण सम्झौता

    पोखरा न्यूज -०७,असार । नेपाल र चीनबीच रेलमार्ग निर्माणमा सहयोग परियोजना सम्बन्धी द्विपक्षीय सम्झौतामा हस्ताक्षर भएको छ । विसं २०७२ मा भएको व्यापार र पारवहन सम्झौताका आधारमा चीनको औपचारिक भ्रमणमा रहेका प्रधानमन्त्री केपी शर्मा ओली र उनका चिनियाँ समकक्षी लि खछ्याङबीच गे्रट हल अफ द पिपलमा भएको प्रतिनिधि मण्डल स्तरीय वार्तामा रेलमार्ग निर्माणलगायत १४ विषयमा सम्झौता भएको हो । रेलमार्ग निर्माणसम्बन्धी सम्झौतामा भौतिक पूर्वाधार तथा यातायातमन्त्री रघुवीर महासेठ र उनका चिनियाँ समकक्षी लि सियोपिङले हस्ताक्षर गरे । यसैगरी उनिहरुबीच नेपालको कार्गो यातायातका लागि चीनको स्वशासित क्षेत्र तिब्बतको राजमार्ग प्रयोग गर्नेसम्बन्धी सम्झौतापत्रमा समेत हस्ताक्षर भएको छ । नेपालको राष्ट्रिय योजना आयोग र चीनको राष्ट्रिय विकास र सुधार आयोगबीच उत्पादन क्षमतासम्बन्धी लगानी र सहयोगसम्बन्धी सम्झौतामा हस्ताक्षर भएको छ । अर्थ मन्त्रालयका सचिव राजन खनाल र चिनियाँ आयोगका उपाध्यक्ष झाङ योङले सो सम्झौतापत्रमा हस्ताक्षर गरे । त्यस्तै सिन्धुपाल्चोकको तातोपानी र रसुवागढीमा मितेरीपुल निर्माण गर्न चीनले सहयोग गर्ने बारे पनि सम्झौता भएको छ । ती सम्झौतापत्रमा परराष्ट्र मन्त्रालयका सचिव शंकरदास वैरागी र चिनियाँ विदेश मन्त्रालयका उपमन्त्री कोङ झेङयूबीच हस्ताक्षर भयो । नेपाल र चीनबीचका सहयोग एवं सहकार्यका कार्यक्रम र परियोजना सहजीकरणका लागि दुई परराष्ट्र मन्त्रालयबीचसंयन्त्र स्थापना गर्ने विषयमा सहमति भएको छ । ती मन्त्रालयबीच सहकार्य अभिवृद्धि गर्दै जाने सहमतिसमेत भएको छ । नेपालको ऊर्जा, जलस्रोत तथा सिँचाइ मन्त्रालय र चीनको राष्ट्रिय ऊर्जा प्रशासनबीच नेपालमा ऊर्जा सहकार्य गर्ने विषयमा सहमति भएको छ । ऊर्जामन्त्री वर्षमान पुन र चीनको उक्त निकायका प्रशासक नुर बाइकेलीबीच उक्त सम्झौतामा हस्ताक्षर भएको छ । नेपाल र चीन सरकारबीच आर्थिक र प्राविधिक सहकार्य तथा मानव स्रोत सहकार्य गर्ने अलग अलग सम्झौता पनि भएको छ । सम्झौतामा अर्थ मन्त्रालयका सचिव खनाल र चीनको अन्तर्राष्ट्रिय विकास सहयोग नियोगका उपाध्यक्ष झाओ लिझाउबीच हस्ताक्षर भएको छ । त्यस्तै नुवाकोट दरबार क्षेत्रमा भूकम्पपछिको पुनःनिर्माण तथा रसुवा, दोलखा र सिन्धुपाल्चोकका सार्वजनिक विद्यालय सुदृढीकरण परियोजनामा सहयोग आदान प्रदान सम्बन्धमा पत्र आदान प्रदान भएको छ । The post नेपाल चीनबीच रेलमार्ग निर्माणमा महत्वपूर्ण सम्झौता appeared first on Pokhara News. […]

  • प्रधानमन्त्री ओलीलाई गार्ड अफ अनर

    पोखरा न्यूज -०७, असार। चीनको औपचारिक भ्रमणमा रहेका प्रधानमन्त्री केपी शर्मा ओलीलाई गार्ड अफ अनर प्रदान गरिएको छ । भ्रमणको आज तेस्रो दिन ग्रेट हल अफ पिपलमा प्रधानमन्त्री ओलीलाई गार्ड अफ अनर प्रदान गरिएको हो । सो कार्यक्रममा चिनियाँ प्रधानमन्त्री लि खछ्याङ सहभागी थिए । त्यसअघि प्रधानमन्त्री ओलीले चिनियाँ जनकंग्रेस स्थायी समितिका अध्यक्ष लि झाङसुसँग भेटवार्ता गरेका थिए । ग्रेट हल अफ दि पिपलमा आज भएको भेटवार्तामा आपसीहित र द्विपक्षीय सम्बन्धका बारेमा कुराकानी भएको थियो । प्रधानमन्त्री ओलीले चिनियाँ जनकंग्रेसको अध्यक्षमा निर्वाचित भएकामा लिलाई बधाई दिँदै सफल कार्यकालको कामना गरेका थिए । अध्यक्ष लि ले नेपालको भूकम्प र त्यसले पारेको प्रभाव र पुनःनिर्माणमा भइरहेको प्रगतिका बारेमा प्रधानमन्त्री ओलीसँग जिज्ञासा राखेका थिए । भेटवार्तामा नेपाली प्रतिनिधिमण्डलको समेत थिए । The post प्रधानमन्त्री ओलीलाई गार्ड अफ अनर appeared first on Pokhara News. […]

  • अन्तर्राष्ट्रिय ओलम्पिक दिवसको सन्दर्भमा पोखरामा मैत्रिपुर्ण बास्केटवल

    पोखरा न्युज -०७, असार । अन्तर्राष्ट्रिय ओलम्पिक दिवसको सन्दर्भमा पोखरामा आज (विहिबार) मैत्रिपुर्ण बास्केटवल सम्पन्न भएको छ । कास्की जिल्ला बास्केटवल संघको आयोजनामा पोखराको पृथ्बीनारायण क्याम्पसको बास्केटवल कोर्टमा भएको मैत्रिपुर्ण बास्केटवल प्रतियोगितामा संघ सहितको भुपु खेलाडीहरुको समुह विजयी भएको छ । भुतपुर्व अम्मरसिंह वुवाईज क्लव (ईएस ए.बी.सी) लाई ५–४ को स्कोरले भुपु खेलाडीहरुको टिमले जित हासिल गरेको हो । ईएस ए.बी.सीको तर्फबाट कृष्ण थापाको कम्तानिमा टोली मैदानमा उत्रिएको थियो भने संघका केन्द्रिय उपाध्यक्ष जुम गुरुङको कप्तानिमा भुपु खेलाडीहरुको टोली मैदानमा उत्रिएको हो । विजयी खेलाडीहरुलाई प्रदेश नम्बर ४ का सांसद मोहन रेग्मी, नेपाल ओलम्पिक कमिटिका सदस्य, नेपाल ह्याण्डवल संघका अध्यक्ष तेज गुरुङ, जिल्ला खेलकुद विकास समिति कास्कीका अध्यक्ष यम बहादुर गुरुङ, संघका केन्द्रिय उपाध्यक्ष जुम गुरुङ, संघ कास्कीका अध्यक्ष ध्वज कुमार गुरुङ, निवर्तमान अध्यक्ष नेत्र बहादुर शेन, बगर भाईखलकका अध्यक्ष दिल बहादुर गुरुङ लगायतले प्रमाणपत्र तितरण गरेका हुन्। यसैबिच कास्की जिल्ला बास्केटवल संघका संरक्षक कर्णेंल जेपी त्रसको ९५ औं जन्म दिनको अवसरमा केट काटेर शुभकामना आदन प्रदान गरी उनको जन्मोउत्सव मनाईएको संघ कास्कीका अध्यक्ष गुरुङले बताए । त्यसै गरी भोलि (सुक्रबार) पोखराको बुद्धचोकमा रहेको सोसियल पव्लिक स्कुलमा खेलकुद सम्बन्धि हाजिर जबाफ प्रतियोगिता हुने भएको बिद्यालयका प्रवन्ध निर्देशक खिम बहादुर गुरुङले बताए । The post अन्तर्राष्ट्रिय ओलम्पिक दिवसको सन्दर्भमा पोखरामा मैत्रिपुर्ण बास्केटवल appeared first on Pokhara News. […]

  • पर्यटकीय होटलको स्तरोन्नति गरिँदै

    पोखरा न्युज -०७, असार । पर्यटकको आगमनमा कमी हुने समय पारेर सौराहाका होटल व्यवसायीले स्तरोन्नतिको काम थालेका छन् । असारमा वर्षभरि नै सबैभन्दा कम पर्यटक आउने गर्दछन् । जेठसम्म सामान्य अवस्थामा रहने भए पनि असारमा सौराहा क्षेत्र सुनसान हुन्छ । साउन लागेपछि क्रमशः पर्यटक आगमनमा वृद्धि हुँदै जान्छ । असारमा सरकारी निकायले बजेट सक्नका लागि गर्ने केही कार्यक्रमबाहेक अन्य कार्यक्रम हुँदैनन् । क्षेत्रीय होटल संघ चितवन सौराहाका अध्यक्ष सुमन घिमिरेका अनुसार गत वर्ष बाढी पसेर क्षति पुर्याएका र मर्मत सम्भार नभएका होटलको मर्मत सम्भार अहिले भइरहेको छ । कतिपयले पौडी पोखरी अहिले बनाउँदैछन् भने कोठा थप्ने, सभाहल बनाउने, भान्साघर स्तरीय बनाउने, बगैँचामा बोटबिरुवा रोप्नेलगायतका काम गरिरहेका छन् । पर्यटक कम हुँदा काम गर्न सजिलो हुने भएकाले यही समय पारेर होटल मर्मत सम्भार र स्तरोन्नतिका काम गर्नतर्फ लागेको उनले बताए । जंगल सफारी लजका सञ्चालकसमेत रहनुभएका घिमिरेले आफ्नो होटलमा पौडी पोखरी निर्माणको काम भइरहेको बताए । सौराहाका ११० होटलमध्ये ११ वटामा पौडी पोखरीको सुविधा रहेको छ । अन्य होटलले पनि स्तरवृद्धिसँगै पौडी पोखरी निर्माण गर्ने तयारी गरेका छन् । क्षेत्रीय होटल संघका पूर्वअध्यक्ष नारायण भट्टराईको जंगल वाइल्ड लाइफ क्याम्पमा पनि मर्मत सम्भारको काम भइरहेको छ । भट्टराईका अनुसार बगैँचा बनाउने, रंगरोगन गर्ने, गत वर्षको बाढीले बिगारेपछि मर्मत सम्भार नभएका कोठा यही मौका पारेर काम भइरहेको उनले बताए । होटल सेभेन स्टारका सञ्चालक माधव दुवाडी अहिले तीव्र गतिमा मर्मत सम्भारका कामलाई अगाडि बढाएको बताउछन् । रेस्टुराँ विस्तार गर्ने, वातानुकुलित कोठाको मर्मत गर्ने, कोठाभित्रको आन्तरिक सजावटमा परिवर्तन गर्ने तथा रंगरोगन गर्ने काम भइरहेको छ । गत वर्षको भदौमा बाढीका कारण सौराहाका सबै होटलमा क्षति पुगेको थियो । तत्काल सरसफाइ गरी होटल सञ्चालनमा आए पनि कतिपय होटलका केही कोठा सञ्चालनमा आउन सकेका थिएनन् । बगैँचा बिग्रिएका थिए । ती सबैको मर्मत सम्भार र स्तरोन्नतिको काम अहिले भइरहेको छ । सौराहाका ११० होटलमा दुई हजार ७५० कोठा छन् । पाँच हजारभन्दा बढी पर्यटक अट्नसक्ने व्यवसायीको भनाइ छ । चितवनमा पर्यटकीय होटलको संख्या १५० रहेको छ । होटल व्यवसायमा के–कति लगानी छ भन्नेबारेमा यकिन तथ्यांक नभए पनि सौराहामा मात्रै रु सात अर्बभन्दा बढीको लगानी भएको व्यवसायी बताउँछन् । पछिल्लो समय जग्गासहित खरिद गरेर होटल खोलिएका भए पनि पहिलेका होटल आफ्नै पुर्खाैली जग्गा वा सस्तो मूल्यमा किनेका जग्गामा बनेका कारण यकिन लगानी संकलन हुन सकेको छैन । केही वर्षअघिसम्म सौराहाका होटल व्यवसायीले यो मौसममा कर्मचारीलाई आधा तलब दिएर छुट्टि दिने गर्दथे । पछिल्ला वर्षमा भने आन्तरिक पर्यटक केहीमात्रामा आउने तथा होटल मर्मत सम्भार र स्तरोन्नति गर्न थालेपछि कर्मचारीलाई बिदा दिन छाडिएको छ । The post पर्यटकीय होटलको स्तरोन्नति गरिँदै appeared first on Pokhara News. […]

  • सारंगी रेटेरै बिताए दिलबहादुरले ४० वर्ष

    पोखरा न्युज -०७, असार । ‘आयो गयो फेरियो व्यवस्था । आफ्नो भने उस्तै छ अवस्था ।। कल्ले के गर्छ ? पायसी सबैले आफ्नै पेट भर्छ ।। गुल्मीको वडागाउँ घर बताउने ५७ वर्षीय दिलबहादुर गन्धर्वले सारंगी रेट्दै यो गीत गाउँदा म्याग्दीको मंगला गाउँपालिका–४ बरङ्जामा धेरैका आँखा रसाए । २०३५ सालमा १७ वर्षको उमेरदेखि सारंगी भिरेर विभिन्न जिल्लाका गाउँगाउँमा गीत गाउँदै निस्केका गन्धर्वका तीन छोरी, एक छोरा र एक श्रीमती छन् । परिवारको हातमुख जोड्नका लागि सारंगी रेट्दै म्याग्दी आइपुगेका गन्धर्वले गीतमार्फत आफ्नो दुःखेसो पोख्दै सहयोगका लागि हात जोडेको देखेर वरङ्जाकी सुमित्रा सापकोटाले रु १०० र तीन माना चामल दिँदा गन्धर्वको अनुहार खुशीले भरियो । कुनै दिन बम्बई, गोरखपुर र कलकत्ताका कोठीमा नेपाली चेली बेचिएको, कतै सासूले बुहारी मारेको अनि फक्ल्याण्डको टापुमा लड्दालड्दै वीरगति प्राप्त गरेका खबरको बाहक बनेर गाउँघरमा सारंगी रेट्ने गाईने दाइ हिजोआज देखिन छाडेका छन् । देश विदेशका घटनालाई लस्के, चाँचरी, मालश्री, मंगला, बारामास, सन्देश, धनसीरा, मल्लार, सरुमैरानी, कला खलेनी, असारेलगायतका भाखामा खबर दिँदै घुम्ने गाईने दाइ (गन्धर्व) लोप हुँदैछन् । सारंगीको धुनमा घटनाक्रमलाई सिलसिलेवार कलात्मक ढंगबाट प्रस्तुत गरिरहँदा चौफेरामा बस्नेको आँखा रसाउँथे । गीत संगीतको माध्यमबाट सूचना र समाचार बाँड्दै जनतालाई सुसूचित बनाउने गाईने दाइका सारंगी हिजोआज गाउँघरमा गुञ्जन छोडेका छन् । सूचना र सञ्चारको पहुँचसँगै ग्रामीण क्षेत्रमा समेत पाश्चात्य गीतसंगीतको प्रभाव बढ्दै गइरहेका बेला कहिलेकाहीँ गाउँघरमा डुल्दै आउने र सारँगी रेटेर वीरहका भाका गाउने गन्धर्व हिजोआज विकास निर्माण, जनप्रतिनिधिप्रतिको निराशा र सामाजिक बेथितिका गीत समेत गाउन थालेका छन् । बदलिँदो समयसँगै नयाँ पुस्ता पाश्चात्य गीतसंगीतमा झुम्न थालेपछि हो वा पुख्र्यौली पेशाबाट गुजारा नचल्ने अवस्था देखेर हो आजभोलि गाउँघरमा गाइने दाइको नामले चिनिने गन्धर्व क्रमशः घट्दै गइरहेका छन् । गाउँघरका वीरह र बेदनाका भाका गाउने गन्धर्वले बदलिँदो समयसँगै आफ्नो गीतको स्वरुपलाई पनि परिवर्तन गरेका छन् । धेरै समयपछि बेनपा–२, बगरफाँट र मंगला–४ वरङजामा भेटिएका दिलबहादुर गन्धर्वले पनि अरु कुनै सीप नभएकाले पुख्र्यौली पेशालाई अपनाउनु आफ्नो बाध्यता भएको दुखेसो पोख्दै सारंगीको धुनमा जनतामा ब्याप्त निराशा र जनप्रतिनिधिप्रतिको अपेक्षाका बारेमा ¥याँइ¥याँइ सारंगी रेट्दै तीतो यथार्थ व्यक्त गरे । गुल्मीदेखि बागलुङ हुँदै म्याग्दीको वरङ्जा आइपुगेका गन्धर्वले गीतमा संविधान निर्माणका कुरादेखि लिएर गणतान्त्रिक नेपालको अस्तव्यस्तता, तीनवटै तहको निर्वाचन र त्यसपछिको समसामयिक अवस्थालाई सरल शब्दमा जनताले बुझ्ने गरी व्यक्त गरेका थिए । सूचना र सञ्चारको पुरानो माध्यम गन्धर्वको पेशा अहिले एकाएक विस्थापित भएको छ । सूचना र सञ्चार प्रविधि रेडियो, पत्रपत्रिका, टेलिभिजन, फोन, मोबाइलजस्ता अत्याधुनिक सूचना प्रविधिको विकासले गन्धर्वको पेशालाई विस्थापित बनाएको हो । त्यसैले त गाउँ घरमा गाइने खबरमूलक मर्मस्पर्शी हृदयविदारक गीत गुञ्जन छाडेका छन् । गाउँगाउँमा खबर सुनाउँदै हिँड्ने गाइने दाइको अभाव खड्किरहेका बेला पुर्खौली जातीय पेशालाई निरन्तरता दिँदै जीवनयापन गरेका छन्, केही गन्धर्वले । गुल्मी जिल्लाको गडगाउँ गाविस–५ घर भई (हाल बागलुङ नगरपालिका–२ बस्ने) टोपबहादुर गन्धर्वले परम्परागत जातीय पेशाबाट आफ्नो चारजनाको परिवारको गर्जाे टार्ने गरेका छन् । काँधमा निलो जेब्रा झोला, शिरमा ढाकाटोपी, गलामा सारंगी भिरेर बागलुङ, पर्वत र म्याग्दीका विभिन्न भागमा घुम्ने टोपबहादुरले दैनिक रु ५/७ सय आम्दानी हुने बताउछन् । सूचना र मनोरञ्जनका श्रव्य, दृष्य सामग्रीको सुलभ उपलब्धताले सारंगीको महत्व ह्वात्तै घटेको छ टोपबहादुरले भने– “सञ्चार प्रविधिमा भएको विकासले हाम्रो पेशा संकटमा प¥यो । सञ्चारमाध्यमले सारंगीको महत्वलाई उचित स्थान नदिए सारंगी नै लोप हुनेछ ।” “कला संस्कृतिको धनी देशमा मौलिक संस्कृति लोप हुनु राम्रो होइन”– गन्धर्वले भने– “यसको संरक्षण र सम्वद्र्धनमा सबैले ध्यान दिनुपर्छ।” नेपाली संस्कृतिको महत्व र वीरताको गाथा बोकेको सारंगीलाई आधुनिकीकरण गरी व्यवसायीकरण गर्नुपर्ने आवश्यकता देखिएको छ । सांगीतिक कक्षाको पाठ्यक्रममा सारंगी बाजालाई समावेश गरे सारंगीले जीवन्तता पाउने बुद्धिजीवीको भनाइ रहेको छ । युवा वर्गमा जातीय पेशाप्रति हीनताबोध र वैदेशिक रोजगारको प्रतिस्पर्धाले गन्धर्व पेशा संकटमा पर्दै गएको बताइएको छ । The post सारंगी रेटेरै बिताए दिलबहादुरले ४० वर्ष appeared first on Pokhara News. […]

  • चितवनको जंगलमा बाघ–गैँडा देखाउन ‘भ्यू–टावर’ निर्माण

    पोखरा न्युज -०७, असार। पर्यटकलाई दुर्लभ एकसिंगे गैँडा र पाटे बाघलगायत वन्यजन्तु अवलोकनका लागि चितवनको कुमरोजस्थित जंगलमा भ्यू–टावर निर्माण गरिएको छ । चितवन राष्ट्रिय निकुञ्जसँग जोडिएको कुमरोजमा हालै दुई तलाको आकर्षक भ्यू–टावर निर्माण गरिएको कुमरोज मध्यवर्ती सामुदायिक वनका अध्यक्ष हीराबहादुर गुरुङले बताए । दुई वटा भ्यू–टावर भने हालसालै निर्माण भएको वनका कार्यालय सचिव भरत नेपालले जानकारी दिए । हेलिप्याड चौरमा एउटा र खत्री घाटमा अर्काे टावर निर्माण भएको हो । ती दुई वटा क्षेत्र बाघ र गैँडा अवलोकनका लागि महत्वपूर्ण ठाउँ मानिएको छ । बाघको बासस्थान राम्रो रहेकाले ती क्षेत्रमा टावर बनाइएको हो । केही महिनाअघि खत्री थरका एकलाई सोही स्थानमा बाघले आक्रमण गरेकाले उक्त स्थानको नाम खत्रीघाट राखिएको हो । अन्य क्षेत्रमा पनि थप दुई वटा मचान निर्माणको काम जारी छ । वन्जयन्तुको अवलोकनसँगै आक्रमणबाट जोगिनसमेत यस्ता टावर र मचान महत्वपूर्ण मानिन्छन् । टावार निर्माणका लागि काठ चितवन निकुञ्जबाट सहयोग स्वरुप उपलब्ध भएको थियो र अन्य कामका लागि रु तीन लाख खर्च भएको थियो । टावरबाट वन र वनमा चर्न आएका गैँडा, चित्तल, मृग देख्न सकिन्छ । पाटे बाघ, भालु, तथा मयुर नाचेको दृष्यले टावरमा पुगेका पर्यटकलाई लोभ्याउँछ । मुख्यगरी पर्या–पर्यटन वृद्धिका लागि भ्यू–टावर बनाइएकाले पर्यटकको चहलपहल बढेको स्थानीय संरक्षणकर्मी तथा बूढी राप्ती उपभोक्ता समितिका अध्यक्ष नारायणदत्त तिमिल्सिनाले बताए। अहिले कुमरोजमा एउटा काठ र एउटा कंक्रिटको मचान निर्माणको कामसमेत शुरु भएको स्थानीय ईश्वरी पाठकले जानकारी दिए। यहाँ यसअघि तयार भइसकेको दुई वटा मचानमा १६ पर्यटक बस्नसक्ने क्षमता छ । मचानमा विदेशी पर्यटकलाई रु एक हजार र नेपाली रु ५०० शुल्क लाग्छ । यहाँ पर्यटकका लागि हात्ती, सफारी, जिप सफारी, डुंगा सफारीको सेवासमेत छ । The post चितवनको जंगलमा बाघ–गैँडा देखाउन ‘भ्यू–टावर’ निर्माण appeared first on Pokhara News. […]

  • नेपाल आउने विदेशी पर्यटकको संख्यामा वृद्धि

    पोखरा न्युज -०७, असार ।  सन् २०१७ को मे महिनाको तुलनामा सन् २०१८ को मे महिनामा नेपाल आउने विदेशी पर्यटकको संख्या ९.६ प्रतिशतले वृद्धि भएको छ । अध्यागमन विभागको तथ्यांकअनुसार सन् २०१८ को मे मा ६८ हजार ८२५ विदेशी पर्यटकले नेपाल भ्रमण गरेका छन् । योसहित पाँच महिनामा चार लाख ५४ हजार ८५५ विदेशी पर्यटक नेपाल आएका छन् । सन् २०१७ को सोही अवधिमा १२.५ प्रतिशतले बढी हो । तथ्यांकअनुसार सन् २०१७ को मे महिनाको तुलनामा यस वर्षको मे महिनामा भारतबाट सबैभन्दा बढी ८.६ प्रतिशत पर्यटक आएका छन् । त्यसैगरी दक्षिण एशियाली क्षेत्रीय सहयोग संगठन (सार्क)का मुलुकबाट आउने पर्यटकको आवागमनलाई हेर्दा गत वर्षको यही महिनामा सकारात्मक वृद्धि (२.२ प्रतिशत) देखिन्छ । पर्यटक आगमनको आँकडा हेर्दा चीनबाट नेपाल आउने पर्यटकको संख्या निरन्तर बढ्दै गएको छ । सन् २०१७ को मे महिनाको तुलनामा यस वर्षको मे महिनामा २५.२ प्रतिशतले वृद्धि भएको छ । पर्यटक आगमनमा सार्क मुलुकको तुलनामा एशिया १४.२ प्रतिशतले अगाडि छ । थाइल्याण्ड र सिंगापुरबाट नेपाल आउने पर्यटकको संख्यामा वृद्धि भई क्रमशः ६२.१ प्रतिशत र ११.३ प्रतिशत पुगेको छ । समग्रमा गत वर्षको मे महिनामा युरोपबाट नेपाल आउने पर्यटकको संख्या १८ प्रतिशतले घटेको पाइएको छ । तथापि फ्रान्स र जर्मनीबाट आउने पर्यटकको संख्या क्रमशः २६.८ र ४९ प्रतिशतले बढेको छ । सोही अवधिमा संयुक्त अधिराज्य बेलायतबाट आउनेको संख्या ७.४ प्रतिशतले घटेको देखिन्छ । सन् २०१७ को मे महिनाको तुलनामा सन् २०१८ मे महिनामा अष्ट्रेलिया र न्यूजील्याण्डबाट आउने पर्यटकको संख्यामा क्रमशः १०.४ र २८.७ प्रतिशतले वृद्धि भएको छ । संयुक्त राज्य अमेरिका र क्यानडाबाट पनि अघिल्लो वर्षको तुलनामा सन् २०१८ को मे महिनामा क्रमशः ७.४ र ५.३ प्रतिशतले पर्यटक आगमनमा वृद्धि भएको छ । The post नेपाल आउने विदेशी पर्यटकको संख्यामा वृद्धि appeared first on Pokhara News. […]

  • इरान माथि स्पेनको जीत, उरुग्वे पनि विजयी

    पोखरा न्यूज -०७, असार। विश्वकप फुटबल अन्तर्गत गए राती भएको खेलहरुमा उरुग्वे र स्पेन विजयी भएका छन् । जीतसँगै उरुग्वे दोस्रो चरणमा प्रवेश गरेको छ भने स्पेनले पनि अघिल्लो चरणमा प्रवेश गर्ने आफ्नो सम्भावना बलियो बनाएको छ । गएराति भएको समूह ‘क’ को खेलमा उरुग्वेले साउदी अरबलाई १-० ले हराएको थियो । उसका लागि स्टार स्ट्राइकर लुइस सुआरेजले खेलको २३ औं मिनेटमा गोल गरेका थिए । उक्त गोल नै निर्णायक बन्दा एसियाली प्रतियोगी साउदी अरब भने दोस्रो हारसँगै अन्तिम खेल नखेल्दै प्रतियोगिताबाट बाहिरिएको छ । यस समुहबाट उरुग्वे र रसिया दोस्रो चरणमा प्रवेश गरेका छन् । हिजै भएको समूह ‘ख’ को खेलमा स्पेनले इरानलाई १-० कै गोल अन्तरले पराजित गरेको छ । खेलमा स्पेनका डिएगो कोस्टाले ५४ औं मिनेटमा गरेको गोल नै निर्णायक साबित भएको थियो । खेलमा ७८% बल पोजेशन राखेको स्पेनले दोस्रो गोल भने गर्न सकेन । अब समुहको आफ्नो अन्तिम खेलमा स्पेनले प्रतियोगिताबाट बाहिरी सकेको मोरक्कोको सामना गर्नेछ । समुहकै अर्को खेलमा इरानले पोर्चुगलको सामना गर्नेछ । समुहमा स्पेन र पोर्चुगलले समान ४-४ अङ्क बनाउँदा इरानको ३ अङ्क छ भने मोरक्को अङ्कविहिन छ । विश्वकप अन्तर्गत आज फ्रान्स र पेरुबीच पहिलो खेल हुनेछ भने दोस्रो खेलमा डेनमार्क र अस्ट्रेलिया भिड्नेछन् । तेस्रो खेल अर्जेन्टिना र क्रोएशियाको बीच हुनेछ । तस्वीर : Reuters The post इरान माथि स्पेनको जीत, उरुग्वे पनि विजयी appeared first on Pokhara News. […]

  • रुकुममा विवाद हुँदा दाइद्वारा भाइको हत्या

    पोखरा न्युज -०७, असार । रुकुम पश्चिममा आफ्नै दाइले भाइको हत्या गरेका छन् । जिल्लाको आठबिसकोट नगरपालिका–१२ का आन्दाजी ४४ वर्षीय रुद्रबहादुर पुनले आफ्नै सहोदर भाइ आन्दाजी ४० वर्षीय जोखबहादुर पुनको आज बिहान करीब ४ बजे हत्या गरेको प्रहरीले जानकारी दिएको छ । जग्गासम्बन्धी सामान्य विवादका कारण रुद्रले खुकुरी प्रहार गरी जोखबहादुरको हत्या गरेको जिल्ला प्रहरी कार्यालय, रुकुम पश्चिमका प्रहरी नायब उपरीक्षक सुमित खड्काले जानकारी दिए। हत्या गर्ने रुद्रबहादुर पुनले जिल्ला प्रहरी कार्यालयमा आएर आत्मसमर्पण गरेको प्रहरी नायब उपरीक्षक खड्काले बताए । जोखबहादुरको शव परीक्षणका लागि जिल्ला अस्पताल सल्ले, रुकुम ल्याइँदैछ । यो घटना मामाको घर डाँचीकोट गाउँपालिका–६ मग्मामा भएको हो । The post रुकुममा विवाद हुँदा दाइद्वारा भाइको हत्या appeared first on Pokhara News. […]